Buresbirgenguovlluin lea ovddasvástádus sode-bálvalusaid ja gádjundoaimma ordnemis
Buresbirgenguovllut leat 21 ja dat hápmahuvvet eanas eanangoddejuogu vuođul. Uusimaa eanangoddi lea juhkkojuvvon njealji buresbirgenguvlui. Helssega gávpogis lea ovddasvástádus sode-bálvalusaid ja gádjundoaimma ordnemis. HUS-ovttastumis lea ovddasvástádus sierra merrejuvvon gáibideaddji sierrabuohccedikšuma bargguin guovllustis.
Buresbirgenguovllut leat hábmejuvvon sosiála- ja dearvvašvuođa fuolahusa ja gádjundoaimma ođastusas, mii lea okta Suoma historjjá mearkkašahttimus hálddahuslaš ođastusain. Ođastus dárbbašuvvo ovttaveardásaš bálvalusaid sihkkarastima várás, gáržžidit buresbirgema ja dearvvašvuođa erohusaid sihke goahcat goluid stuorruma.
Buresbirgenguovllut leat iešmearridanguovllut. Buresbirgenguovlluid ruhtadeapmi vuođđuduvvá stáhta ruhtadeapmái, iige guovlluin leat doaisttážii vearuhusriekti. Ruhtadeamis váldojuvvojit vuhtii guovlluidgaskasaš erohusat bálvalandárbbuin.
Buresbirgenguovllu barggut
Earret eará barggut, mat leat buresbirgenguovllu ovddasvástádussan:
- Vuođđodearvvašvuođa fuolahus
- Spesiálabuohccedikšun
- Sosiálafuolahus
- Mánáid, nuoraid ja bearrašiid bálvalusat
- Bargoahkásaččaid bálvalusat
- Mielladearvvašvuođa ja gárrenávnnasbálvalusat
- Lápmásiid bálvalusat
- Oahppifuolahus
- Gádjundoaibma
- Vuosttašdikšun
Buresbirgenguovlluid ja gielddaid ovttasbarggus deaddočuokkis lea buresbirgejumi ja dearvvašvuođa ovddideamis, mii unnida dárbbu sosiála- ja dearvvašvuođa fuolahusa bálvalusaide. Dasa lassin priváhta doaibmit sihke organisašuvnnat ja searvvit dievasmahttet almmolaš sosiála- ja dearvvašvuođa bálvalusaid. Gielddaid ovddasvástádussan lea dás duohkonai earret eará beaivedikšumis, oahpahusas, lihkadeamis ja kultuvrras.
Guovlluválga ja mearrádusdahkan
Juohke buresbirgenguovllus lea guovllustivra, mas lea ovddasvástádus guovllu doaibmamis ja ekonomiijas. Áirasat válljejuvvojit buresbirgenguovllu guovlluválggas. Čuovvovaš guovlluválga dollojuvvo jagi 2025.
Buresbirgenguovllus leat maid golbma váikkuhandoaibmaorgána: nuoraidstivra, vuorrasiidráđđi ja lápmásiidráđđi. Dasa lassin guovllu orrut sáhttet váikkuhit nu ahte dahket álgagiid.
- Vuoigatvuođaministeriija válga.fi -fierbmesiidu (suomagillii)
- Guovllustivraáirasa ofelaš (suomagillii)
Lassidiehtu buresbirgenguovlluid bálvalusain gávnnat iežat buresbirgenguovllu fierbmesiidduin.
