Hyppää sisältöön
Stáhtaráđđi ja ministeriijat Media

Sdm addá rávvagiid sosiálafuolahusa orrunbálvalanovttadagaid dálkkasfuolahusa ordnemis koronaepidemiija áigge

Sosiaali- ja terveysministeriö 7.4.2020 14.22 | Julkaistu suomeksi 14.4.2020 klo 16.13
Dieđáhus 84/2020

Sosiálafuolahusa orrunbálvalanovttadagas lea dehálaš sihkkarastit dorvvolaš dálkkasdikšuma maiddái koronavirusepidemiija áigge. Dálkkasdikšun galgá ollašuhttojuvvot dáin ovttadagain vuosttažettiin guđege orru persovnnalaš dálkasiiguin. Ovttadagas sáhttá goitge váldojuvvot atnui ráddjejuvvon dálkkasvuorká akuhttadiliid várás.

Dálkasiid seailluheamis oktasašgeavahusa várás sosiálafuolahusa orrunbálvalanovttadagain ii leat gustojeaddji láhkaásaheapmi. Sosiála- ja dearvvašvuohtaministeriija lea ráhkadan rávvaga čielggasmahttit dili.

SDM:a rávvagis govviduvvon akuhttadálkkasvuorkkáin lea ulbmil dorvvastit orruid dálkkasdikšun diliin, main orru buozalmas dehe dilli gáibida jođánis dálkkasdikšuma. Akuhttadálkkasvuorkkáin sáhttá sihkkarastojuvvot vealtameahttun dálkkasdikšun ovdamearkka dihte ijaid ja vahkuloahpaid sihke unnidit orruid dárbbašmeahttun sirdimiid dearvvašvuohtafuolahusa gohcinovttadagaide.

Dálkkasdikšunproseassa dorvvolašvuohta ferte sihkkarastojuvvot

Ulbmil lea, ahte akuhttadálkkasvuorkkát dollet sisttisteaset dušše muhtin dálkkasbuktagiid, mat leat vealtameahttumat ovttadaga orruid fáhkka dálkkasdišundárbbuid várás.  

Ovddasvástádus ovttadaga dálkkasdikšumis lea ovttadaga ovddasvástideaddji doaktáris. Son meroštallá maid, maid dálkasiid akuhttadálkkasvuorká sáhttá doallat sisttis ja váldit ovddasvástádusa das, ahte dálkkasdikšunproseassa lea dorvvolaš.

Dálkkasdikšun vuođđuduvvá álohii doaktára addin mearramii. Dálkkasdikšumii oassálastiid oasis galgá oažžut sihkarvuođa dárbahassii buori dálkkasdikšuma máhttimis ja dárbbašlaš dálkkaslobiin. Akuhttadálkkasvuorkái galgá nammaduvvot ovddasvástideaddji olmmoš, gii lea lágalažžan dahkkon dearvvašvuohtafuolahusa ámmátolmmoš.  

Dikšunávžžuhusat galget doahttaluvvot buot diliin ja dálkkasdikšuma álggaheapmi galgá álohii vuođđuduvvat áššáigullevaš dikšundárbbu árvvoštallamii, SDM:a rávvágiin muittuhuvvo.

SDM:a ráva einnosta boahttevaš láhkaásaheami

Sosiála- ja dearvvašvuohtaministeriijas válmmaštallojuvvo bárrásiin láhkaásaheapmi sosiálafuolahusa orrunbálvalanovttadagaid akuhttadálkkasvuorkkáin. Ulbmilin lea, ahte evttohus mearrádusain addojuvvo riikkabeivviide giđa dehe geasi áigge.

Ovdal láhkaásaheami fápmuiboahtima sosiálafuolahusa ovttadagain galget doahttaluvvot Sosiála- ja dearvvašvuohtafuolahusa lohpe- ja bearráigeahččodoaimmahaga Valvira, Fimea ja guovluhálddašandoaimmahagaid addin rávvagat.  

Lassidieđut

hoavda Heidi Tahvanainen, [email protected]

spesiálaáššedovdi Noora Oinonen, [email protected]